USAFI NI AFYA

Na;Martin Masawe,Ruaha Media

























Mmoja wa wanafunzi katika chuo cha Uandishi wa habari na Utangazaji Arusha Lidya Kishia (pichani) akifanya usafi katika soko la Mbauda.Picha na Martin Masawe.

Wanafunzi wa chuo cha uandishi wa  habari na utangazaji Arusha wamejitolea   kufanya usafi katika soko la mbauda kama mojawapo ya shughuli za kijamii   ili kuonyesha mfano kwa jamii ikiwa wao ni kioo cha jamii.

Akizungumza na waandishi wa habari  mkufunzi wa chuo hicho Verediana  Akonaye, alisema lengo lao kufanya hivyo ni ili kujenga mahusiano mazuri na jamii  kama waandishi wa habari na maafisa uhusiano watarajiwa, katika  kuchangamana na shughuli za kijamii.

Naye afisa afya wa kata ya Sombetini ndugu Beatha Gitaguo amesema kuwa wamefurahishwa na jambo hilo  kwani ni ushirikiano mzuri kati ya chuo na jamii inayowazunguka kwani kwa kufanya hivyo ni kuielimisha jamii kuhusu umuhimu wa kuyaweka mazingira yanayowazunguka katika hali ya usafi.

“Tumeshukuru sana kwa ujio wenu wa kuamua  kutuunga mkono katika suala la usafi, na hivi mlivyofanya hata wanajamii wamejiuliza maswali mengi kama nyinyi msiohusika na soko hili mmeamua kufanya usafi je wao si zaidi katika kufanya hivyo?”alisema Beatha.

  Pamoja na hayo alisema kuwa soko hilo lina wafanyakazi watatu wa kufagia katika eneo lote la soko, na hivyo kuwapa tabu wakati wa  kufagia kutokana na miundombinu ya soko hilo kuwa mibovu.

 Kwa upande wake  mmoja wa wafanya biashara wa soko hilo Hassani  Athumani alisema kuwa amefurahishwa na jambo hilo  na kusema kuwa usafi ni nyenzo muhimu kwa maisha ya binadamu. 

 

 Kutokana na kufanyika  kwa usafi eneo hilo wakazi watumiaji  wa  soko la mbauda,  wamewapongeza wanafunzi wa chuo  hicho kwa  kujitolea kufanya usafi katika soko hilo na kuwataka wawahamasishe jamii kuzingatia usafi ili waweze kuepukana na maradhi.